ურთიერთობები საქართველოსა და ბელგიის სამეფოს შორის

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და ბელგიის სამეფოს შორის დამყარდა 1992 წლის 5 ივნისს.

ბელგიის სამეფოში საქართველოს დიპლომატიური წარმომადგენლობა გაიხსნა 1993 წელს.

საქართველოს საგანგებო და სრულუფლებიანი ელჩები ბელგიის სამეფოში 

  • ნატალი საბანაძე 2013 - დღემდე
  • სალომე სამადაშვილი 2005-2013
  • კონსტანტინე ზალდასტანიშვილი 2000-2005
  • ზურაბ აბაშიძე 1994-2000

ბელგიის სამეფოს საგანგებო და სრულუფლებიანი ელჩები საქართველოში:
2012 წლიდან საქართველოს გადაფარვა ხორციელდება აზერბაიჯანში ბელგიის სამეფოს საელჩოს მიერ:

  • ბერტ სხოფსი 2016 - დღემდე
  • კარინ პეწი 2013-2016
  • ლუკ ტრუიენი 2012-2013

2004-2012 წლებში საქართველოს გადაფარვა ხორციელდებოდა ბრიუსელიდან.

  • სტეფან დე ლოკერი 2010 -2012
  • შარლ გისლენი 2007-2010
  • დანიელ დელ მარმოლი 2004-2006

თანამშრომლობის სფეროები

საქართველოსა და ბელგიას შორის ჩამოყალიბებულია მჭიდრო პარტნიორული ურთიერთობები. ორმხრივი ვიზიტების დინამიკა აქტიურია. აღსანიშნავია, რომ 10 წლიანი პაუზის შემდეგ გაიმართა ქვეყნებს შორის ორმხრივი პოლიტიკური კონსულტაციები. ასევე, 2018 წელს განხორციელდა ბელგიის სამეფოს საგარეო საქმეთა მინისტრის დიდიე რეინდერსის სამუშაო ვიზიტი საქართველოში.

ქვეყნებს შორის საერთაშორისო ორგანიზაციების ფარგლებში თანამშრომლობა დინამიურობით გამოირჩევა. ბელგია მტკიცედ უჭერს მხარს საქართველოს ტერიტორიულ მთლიანობას. ბელგიისა და საქართველოს პარლამენტებში ფუნქციონირებს მეგობრობის ჯგუფები. ორ ქვეყანას შორის ხელმოწერილია ხუთი შეთანხმება, რომლებიც ეკონომიკის, ტრანსპორტისა და ტურიზმის სფეროებში თანამშრომლობის განვითარების შესაძლებლობას იძლევა.

ბელგიური მხრიდან აქცენტი კეთდება ორმხრივი პოლიტიკური და სავაჭრო-ეკონომიკური თანამშრომლობის განვითარებაზე. ბელგიის სამეფოს ვალონიის რეგიონის ექსპორტისა და ინვესტიციების სააგენტო (AWEX) 2015-2016-2017 წლებში საქართველოს ბიზნეს მისიით სტუმრობდა.

საგულისხმოა, რომ 2011 წლიდან ფუნქციონირებს ბენილუქსი-საქართველოს სავაჭრო პალატა.

აქტიურად მიმდინარეობს თანამშრომლობა განათლების, მეცნიერებისა და კულტურის სფეროებში, ასევე იდგმება ნაბიჯები ბელგიაში საქართველოსა და ქართული კულტურის ცნობადობის გაზრდის მიზნით, რასაც ხელს უწყობს მრავალრიცხოვანი ღონისძიებები, განხორციელებული და მიმდინარე პროექტები (გამოფენები, კონცერტები, სემინარები და სხვა). აღსანიშნავია, რომ 2018 წლის 5 ივნისს პირველი დემოკრატიული რესპუბლიკის შექმნის 100 წლისთავისადმი მიძღვნილი მიღება და საქართველოს ნაციონალური ბალეტის "სუხიშვილების" კონცერტი ბრიუსელში ხელოვნების ხელოვნების ცენტრში "ბოზარი" გაიმართა.

ბმულები:

საქართველოს საელჩო ბელგიის სამეფოში
ბელგიის სამეფოს საგარეო საქმეთა, საგარეო ვაჭრობისა და თანამშრომლობის სამინისტრო
ბელგიის სამეფოს მონარქი
ბელგიის სამეფოს პრემიერ-მინისტრის ოფისი