საქართველოსა და დანიის სამეფოს შორის არსებული ორმხრივი ურთიერთობები

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და დანიის სამეფოს შორის დამყარდა 1992 წლის 1 ივლისს.

დანიის სამეფოში საქართველოს დიპლომატიური წარმომადგენლობა გაიხსნა 2006 წელს.

საქართველოს საგანგებო და სრულუფლებიანი ელჩები დანიის სამეფოში (რეზიდენციით კოპენჰაგენი):

  • გიგი გიგიაძე 2016 დეკემბერი - დღემდე
  • ნიკოლოზ რთველიაშვილი  2011 - 2016
  • დავით კერესელიძე 2006-2011

დანიის სამეფოს საგანგებო და სრულუფლებიანი ელჩები საქართველოში (რეზიდენციით კიევი):

  • რუბენ მადსენი 2016 - დღემდე
  • ქრისტიან დონს ქრისტენსენი 2015-2016
  • მერეტე იული 2013-2015
  • მიხაელ ბორგ-ჰანსენი 2009-2013
  • უფე ანდერსონ ბალსლევი 2006-2009
  • კრისტიან ფაბერ როდი 2004-2006
  • მარტინ კოფორდი 2001-2004
  • იორნ კროგბეკი 1997-2001

საქართველოში დანიის სამეფოს საპატიო კონსული ესბენ ემბორგი.

თანამშრომლობის ძირითადი სფეროები

ორმხრივი ურთიერთობების მნიშვნელოვანი ნაწილია „დანიის სამეზობლო პროგრამის” (DANEP) სტრატეგია (2013-2017 წლებისთვის), რომელიც  ჯერ კიდევ 2013 წელს დამტკიცდა, სადაც საქართველო, ევროპის სხვა 6 ქვეყანასთან ერთად იყო. თანამშრომლობა ძირითადად ადამიანის უფლებების, კანონის უზენაესობის და ენერგეტიკის სექტორის, მართლმსაჯულების რეფორმის და ადამიანთა და უმცირესობათა უფლებების დაცვის მიმართულებებით მიმდინარეობდა.

2016 წელს გადაიხედა „დანიის სამეზობლო პროგრამის” სტრატეგია, რომლის მიხედვითაც მომავალი 5 წლის პერიოდში (2017-2021) შემცირდა ბიუჯეტი და ასევე, ბენეფიციარი ქვეყნების რაოდენობა. კერძოდ, 7 ქვეყნიდან, პრიორიტეტული ქვეყნების ნუსხაში დარჩა მხოლოდ საქართველო და უკრაინა. „DANEP“-ის ორი მთავარი მიმართულებაა: დემოკრატიისა და ადამიანის უფლებების ხელშეწყობა; მდგრადი და ინკლუზიური ეკონომიკური განვითარების მხარდაჭერა. ბიუჯეტი გადანაწილდა შემდეგნაირად: 2017-2021 წლების პერიოდში გამოიყოფა 860 მილიონი დანიური კრონა (116 მლნ ევრო). აქედან საქართველო 27  მლნ ევროს მიიღებს.

სამეზობლო პოლიტიკის ფარგლებში დანიის მთავრობა ახორციელებს მრავალმიზნობრივ პროგრამას (2015-2019 წლები) „მდგრადი ენერგიისა და ენერგოეფექტურობის მხარდაჭერა საქართველოში“. პროგრამა ორი კომპონენტისგან შედგება, რომელთა მიზანია საქართველოს ენერგოეფექტურობისა და მდგრადი ენერგიის განვითარება. ეს მოიცავს ენერგეტიკის სფეროში რეფორმების განხორციელებას ევროკავშირი-საქართველოს ასოცირების შეთანხმების ფარგლებში.

საქართველოს უმცირესობების დაცვისა და იძულებით ადგილნაცვალ პირთა ინტეგრაციის და ზოგადად კონფლიქტით დაზარალებული მოსახლეობის დასახმარებლად განხორციელებულ საქმიანობაში აქტიურ როლს თამაშობს დანიის ლტოლვილთა საბჭო (Danish Refugee Council).

ეკონომიკური თანამშრომლობის ძირითადი სფეროებია: ტრანსპორტი (გადაზიდვები), კავშირგაბმულობა, ნაძვის გირჩის შეგროვება, გადამამუშავებელი მრეწველობა და მედიკამენტები.

უმნიშვნელოვანესია დანიური კომპანიის „მაერსკი“ მიერ ფოთის პორტში განხორციელებული უმსხვილესი ინვესტიცია. „მაერსკმა“ პორტის 80%-იანი წილი შეისყიდა. დანიელებმა 2016 წელს  დაიწყეს ფოთის პორტის განვითარება ახალი გეგმის მიხედვით, რომლის თანახმადაც გაფართოვდება და გაღრმავდება ტერმინალი. 2016 წლის მონაცემებით, კომპანიამ უკვე 30 მილიონიანი ინვესტიცია განახორციელა.

2018 წლის ნოემბრის თვეში, თითქმის 6 წლიანი პაუზის შემდეგ, შედგა საგარეო საქმეთა მინისტრის ნორდიკული ტურნე, რომლის ფარგლებში მინისტრი დანიას ეწვია.

მიმდინარეობს თანამშრომლობა ამბროლაურის მუნიციპალიტეტსა და ჰორსენსის ბიზნეს-საბჭოს შორის სავაჭრო-ეკონომიკურ, ასევე ტურიზმისა და კულტურის დარგში.

ბმულები:

საქართველოს საელჩო დანიის სამეფოში
დანიის სამეფოს საელჩო საქართველოში (რეზიდენციით ქ. კიევი)
დანიის სამეფოს საგარეო საქმეთა სამინისტრო
დანიის სამეფოს ინტერნეტ-პორტალი
დანიის ფოლკეტინგი (პარლამენტი)
დანიის ლტოლვილთა საბჭო