ურთიერთობები საქართველოსა და ისლანდიის რესპუბლიკას შორის

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და ისლანდიის რესპუბლიკას შორის დამყარდა 1992 წლის 21 სექტემბერს.

საქართველოს საგანგებო და სრულუფლებიანი ელჩები ისლანდიის რესპუბლიკაში (რეზიდენციით კოპენჰაგენი):

  • გიგი გიგიაძე 2016 წლის - დღემდე
  • ნიკოლოზ რთველიაშვილი 2011 - 2016
  • დავით კერესელიძე 2006-2011

ისლანდიის რესპუბლიკის საგანგებო და სრულუფლებიანი ელჩები საქართველოში:

2008 წლიდან დღემდე ისლანდიის რესპუბლიკა საქართველოს ფარავს რეიკიავიკიდან.

  • ბენედიკტ ასგეირსონი 2008-დღემდე

1999-2006 წლებში საქართველოს დიპლომატიური გადაფარვა ხორციელდებოდა რუსეთის ფედერაციაში ისლანდიის რესპუბლიკის საელჩოს მიერ.

  • ბენედიკტ იონსონი 2002-2006
  • იონ ეგილ ეგილსონი 1999-2002

თანამშრომლობის ძირითადი სფეროები

ისლანდიასა და საქართველოს შორის ორმხრივი თანამშრომლობა არ გამოირჩევა აქტიურობით, თუმცა, დინამიურია თანამშრომლობა საერთაშორისო ორგანიზაციების ფარგლებში.

ეკონომიკური თანამშრომლობის შემდგომი გაღრმავების თვალსაზრისით აღსანიშნავია, რომ 2016 წლის 27 ივნისს, ქ. ბერნში, შვეიცარიის კონფედერაციაში საქართველოს პრემიერ-მინისტრის, გიორგი კვირიკაშვილის ოფიციალური ვიზიტის ფარგლებში, ხელი მოეწერა ევროპის თავისუფალი ვაჭრობის ასოციაციასთან (EFTA - ისლანდია, ლიხტენშტაინი, ნორვეგია, შვეიცარია) ყოვლისმომცველი თავისუფალი ვაჭრობის შესახებ შეთანხმებას. EFTA-სთან შეთანხმება, ევროკავშირთან ასოცირების შეთანხმებასთან/ღრმა და ყოვლისმომცველ თავისუფალ სავაჭრო სივრცესთან (DCFTA) ერთად განიხილება, როგორც შემდგომი მნიშვნელოვანი ნაბიჯი საქართველოს სავაჭრო-ეკონომიკურ ურთიერთობათა შემდგომი ლიბერალიზაციის მიმართულებით. ისლანდიაში ძალაში შევიდა 2017 წლის 1 სექტემბერს.

აღსანიშნავია, რომ 2016 წლის 6-7 ივნისს შედგა პირველი მაღალი დონის ვიზიტი ისლანდიიდან. საქართველოს ეწვია ისლანდიის ინდუსტრიისა და ვაჭრობის მინისტრი რაგნჰეიდურ ელინ არადოტირი, ისლანდიის ბიზნეს-წრეების წარმომადგენლებთან ერთად. ვიზიტის ფარგლებში გაიმართა სემინარი ენერგეტიკის თემაზე, სადაც ქართულმა და ისლანდიურმა კომპანიებმა განიხილეს განახლებადი ენერგიები და თანამშრომლობის პერსპექტივები.

საქართველოში მოღვაწეობს ორი ისლანდიური კომპანია - „Creditinfo“ და „Landsvirkjun Power and Verkis“ - აჭარაში,  მდინარე მაჭახელაზე  ორი ჰიდრო-ელექტრო სადგურის და მდინარე თერგზე ჰესის აგების საკითხის შესწავლის  და პროექტების დიზაინის მომზადების კუთხით.

არსებობს სავაჭრო-ეკონომიკური თანამშრომლობის განვითარების გარკვეული პოტენციალი, კერძოდ, გამოცდილების გაზიარება თევზჭერის მიმართულებით და საქართველოში ამ სექტორის ხელშეწყობა. შესაძლებელია განხორციელდეს საქართველოში თევზის (სკუმბრიის) ექსპორტი.

ასევე, შესაძლებელია, გეოთერმული ენერგიის მოპოვებასთან დაკავშირებით ისლანდიური გამოცდილებისა და ექსპერტიზის გაზიარება.


ბმულები:

ისლანდიის რესპუბლიკის საგარეო საქმეთა სამინისტრო