ურთიერთობები საქართველოსა და ნორვეგიის სამეფოს შორის

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და ნორვეგიას შორის დამყარდა 1992 წლის 5 ივნისს.

ნორვეგიის სამეფოში საქართველოს დიპლომატიური წარმომადგენლობა გაიხსნა 2012 წელს.

საქართველოს საგანგებო და სრულუფლებიანი ელჩები ნორვეგიის სამეფოში

  • მაია ყიფშიძე - 2017- დღემდე
  • მამუკა ციხელაშვილი  2012-2017

2006-2012 წლებში ნორვეგიის სამეფოს ფარავდა საქართველოს დიპლომატიური წარმომადგენლობა დანიის სამეფოში

  • ნიკოლოზ რთველიაშვილი 2011-2012
  • დავით კერესელიძე 2006-2011

საპატიო კონსული – ლიანა სიგუა 

ნორვეგიის სამეფოს საგანგებო და სრულუფლებიანი ელჩები საქართველოში (რეზიდენციით ბაქო)

  • ბარდ ივარ სვენდსენი 2014 - 2018
  • ერლინგ შონსბერგი  2010-2014
  • იონ რამბერგი  2007-2010
  • სტეინარ გილი  2002-2006
  • ოლავ ბერსტადი  2000-2002
  • პერ ტრესელსტი  1998-2000

თანამშრომლობის ძირითადი სფეროები

ქვეყნებს შორის აქტიურია უწყებათაშორისი თანამშრომლობა და მოიცავს ენერგეტიკას, თავდაცვას, გარემოს დაცვას, კულტურას და განათლებას.

2018 წლის ნოემბრის თვეში, გახდა ცნობილი რომ ნორვეგიულმა მხარემ მიიღო გადაწყვეტილება საქართველოში საელჩოს გახსნის თაობაზე.

2018 წლის ნოემბრის თვეში, თითქმის 6 წლიანი პაუზის შემდეგ, შედგა საგარეო საქმეთა მინისტრის ნორდიკული ტურნე, რომელის ფარგლებში მინისტრი ნორვეგიას ეწვია.

მნიშვნელოვანია მსხვილი ნორვეგიული ინვესტიცია აჭარის ჰიდროენერგო პოტენციალის განვითარების საქმეში. 2011 წელს საქართველოს მთავრობასა და ნორვეგიულ კომპანიას „Clean Energy“ შორის ხელი მოეწერა ურთიერთგაგების მემორანდუმს. მას შემდეგ, კომპანიამ უკვე განახორციელა „შუახევი“ ჰესის პროექტი და მიმდინარეობს კიდევ 4 ჰესის მშენებლობა(კორომხეთი ჰესი, სხალთა ჰესი, ხერთვისი ჰესი, ნამახვან ჰესი).

ნორვეგიის მთავრობის საგრანტო პროგრამის - „Institutional Cooperation Between Ministry of Energy of Georgia and  Norwegian Water Resources and Energy Directorate” ფარგლებში გამოიყო 4 მლნ აშშ დოლარი 2018-2019 წლებისთვის. ამასთან, ნორვეგიული მხარე დაეხმარება საქართველოს კერძო ჰიდროელექტროსადგურებისთვის საგადასახადო სისტემის შემუშავებაში. საქართველოს ამჟამად არ გააჩნია მსგავსი კანონმდებლობა.

ეკონომიკური თანამშრომლობის შემდგომი გაღრმავების თვალსაზრისით აღსანიშნავია, რომ 2016 წლის 27 ივნისს, ქ. ბერნში, შვეიცარიის კონფედერაციაში საქართველოს პრემიერ-მინისტრის, გ. კვირიკაშვილის ოფიციალური ვიზიტის ფარგლებში, ხელი მოეწერა ევროპის თავისუფალი ვაჭრობის ასოციაციასთან (EFTA - ისლანდია, ლიხტენშტაინი, ნორვეგია, შვეიცარია) ყოვლისმომცველი თავისუფალის ვაჭრობის შესახებ შეთანხმებას. EFTA-სთან შეთანხმება, ევროკავშირთან ასოცირების შეთანხმებასთან/ღრმა და ყოვლისმომცველ თავისუფალ სავაჭრო სივრცესთან (DCFTA) ერთად განიხილება, როგორც შემდგომი მნიშვნელოვანი ნაბიჯი საქართველოს სავაჭრო-ეკონომიკურ ურთიერთობათა შემდგომი ლიბერალიზაციის მიმართულებით. EFTA-სთან შეთანხმება ნორვეგიაში ძალაში შევიდა 2017 წლის 1 სექტემბერს.

თავდაცვის სფეროში თანამშრომლობა 2010 წლიდან აქტიურად მიმდინარეობს. აღსანიშნავია, რომ ნორვეგიამ საქართველოს თავდაცვის სფეროს შესაძლებლობების განვითარების (Capacity Building) ხელშესაწყობად შექმნილი, ნატო-ს ახალი ნდობის ფონდის ლიდერობა ითავა. აღნიშნული ფონდი, 2020 წლამდე, დააფინანსებს ნატო-საქართველოს ერთობლივი წვრთნისა და შეფასების ცენტრს (JTEC), სადაც ნორვეგიას უკვე ჰყავს თავისი პერსონალი (მათ შორის ცენტრის ხელმძღვანელი).

ნორვეგიის განათლების სამინისტრო აქტიურად თანამშრომლობდა და აფინანსებდა საქართველოს განათლების სამინისტროს, საქართველოს რეგიონების საჯარო სკოლებში ინკლუზიური განათლების დანერგვის კუთხით. ახლო მომავალში თანამშრომლობა კვლავ გაგრძელდება.

საქართველოს ეროვნულ მუზეუმთან, საქართველოს კულტურისა და ძეგლთა დაცვის სამინისტროსთან და საქართველოს კულტურული მემკვიდრეობის დაცვის ეროვნულ სააგენტოსთან ერთად, კულტურული მემკვიდრეობის ნორვეგიული დირექტორატის ჩართულობით განხორციელდა თბილისის ჩიტაიას სახელობის ეთნოგრაფიული ღია ცის ქვეშ მუზეუმის რეაბილიტაციისა და ბეთლემის უბნის რეკონსტრუქციის პროექტები.

ნორვეგიის მთავრობამ, ივანე ჯავახიშვილის სახელობის თბილისის სახელმწიფო უნივერსიტეტის ეკონომიკის საერთაშორისო სკოლას, ჯერ 2006-2011 წლებში გამოუყო 500.000 აშშ დოლარი ხოლო შემდეგ 2011-2014 წლებში კვლავ 500.000 აშშ დოლარი, გარემოს დაცვის, ენერგეტიკის და ეკონომიკის დარგში ახალი თაობის ეკონომისტების აღსაზრდელად.

2008 წლიდან თბილისის სახელმწიფო კონსერვატორია თანამშრომლობს ნორვეგიის მუსიკის აკადემიასთან. დაარსდა მუსიკალური ტექნოლოგიების სტუდია და ბიბლიოთეკა, რომელიც სტუდენტთა კვალიფიკაციის ამაღლებაზე ზრუნავს.

ნორვეგიის კანონის უზენაესობის მისიის და ნორვეგიის მთავრობის დაფინანსებით, ასევე ოსლოს დეიქმანის სახელობის ბიბლიოთეკის მხარდაჭერით, სასჯელაღსრულების N5 დაწესებულებაში გაიხსნა და წარმატებით ფუნქციონირებს ბიბლიოთეკა.

საქართველოში ნორვეგიის კანონის უზენაესობის მისიის (NORLAG) საშუალებით ნორვეგიის სამეფოს მთავრობა მონაწილეობდა სამართლისა და სასჯელაღსრულების სფეროს რეფორმის სრულყოფაში, ხოლო ნორვეგიის ლტოლვილთა საბჭო (NRC) მუშაობდა დროებით ადგილნაცვალ პირთა დასახმარებლად. 2013 წელს დასრულდა NORLAG და NRC-ის მანდატები საქართველოში.


ბმულები:

ნორვეგიის სამეფოს საელჩო საქართველოში (რეზიდენციით ქ. ბაქო)
ნორვეგიის სამეფოს საგარეო საქმეთა სამინისტრო
ნორვეგიის სამეფოს მთავრობა
ნორვეგიის სამეფოს სტორტინგი (პარლამენტი)
ნორვეგიის კანონის უზენაესობის მრჩეველთა მისია საქართველოში
ნორვეგიის ლტოლვილთა საბჭო