ბერძნული მხარე საქართველოს ოკუპირებულ რეგიონებში შემნილი მდგომარეობის განმუხტვის მიზნით არსებული შესაძლებლობების ეფექტურ გამოყენებას მიესალმება

 
23.09.2019 ქ. ნიუ-იორკი - საქართველოს საგარეო საქმეთა მინისტრმა გაეროს გენერალური ასამბლეის 74-ე სესიის ფარგლებში შეხვედრა გამართა საბერძნეთის საგარეო საქმეთა მინისტრთან ნიკოს დენდიასთან. დავით ზალკალიანმა მიულოცა კოლეგას საგარეო საქმეთა მინისტრის თანამდებობაზე დანიშვნა და გამოთქვა მზადყოფნა აქტიურად ითანამშრომლოს ორი ქვეყნის ურთიერთობაში არსებულ საკითხებზე.

აღინიშნა საქართველოსა და საბერძნეთს შორის ისტორიულად არსებული მეგობრული კავშირები.
 
დავით ზალკალიანმა მადლობა გადაუხადა ბერძნულ მხარეს საქართველოს აქტიური მხარდაჭერისთვის, როგორც არსებული გამოწვევების, ასევე ქვეყნის ევროპული და ევრო-ატლანტიკური ინტეგრაციის პროცესში.
 
მხარეებმა ასევე ისაუბრეს საქართველოსა და რეგიონში არსებულ უსაფრთხოების გარემოზე. დავით ზალკალიანმა კოლეგას მიაწოდა ინფორმაცია საქართველოს ოკუპირებულ რეგიონებში ბოლო განვითარებებზე და გამოთქვა იმედი, რომ პარტნიორების აქტიური ჩართულობით შესაძლებელი იქნება ვითარების შემდგომი დარეგულირება.  როგორც შეხვედრაზე საბერძნეთის მხრიდან აღინიშნა აუცილებელია მოძიებული იქნას ყველა საშუალება იმისათვის რომ არსებულმა ფორმატებმა ეფექტურად იფუნქციონიროს, როსთვისაც საჭიროა ახალ მიდგომებზე ფიქრი. 

მან მადლობა გადაუხადა საბერძნეთს საქართველოს სუვერენიტეტისა და ტერიტორიული მთლიანობის მხარდაჭერისთვის და ევროკავშირის სადამკვირვებლო მისიაში აქტიური მონაწილეობისათვის. აღინიშნა ამ მისიის განსაკუთრებული მნიშვნელობა ადგილზე ვითარების მონიტორინგის და უსაფრთხოების უზრუნველყოფის კუთხით. მხარეებმა ხაზი გაუსვეს ყველა ფორმატის აქტიური გამოყენების აუცილებლობას ადგილზე უსაფრთხოებისა და სტაბილურობის უზრუნველყოფის მიზნით.
 
კმაყოფილებით აღინიშნა ორ ქვეყანას შორის არსებული აქტიური ხალხთაშორისი და კულტურული კონტაქტები. ქართულმა მხარემ საბერძნეთს მადლობა გადაუხადა საბერძნეთში მცხოვრები ქართველებისათვის მიგრაციასთან და ლეგალიზაციასთან დაკავშირებული პროცედურების გამარტივებაზე დაწყებული მუშაობისთვის.
 
მხარეებმა ასევე მიმოიხილეს ქვეყნებს შორის სავაჭრო-ეკონომიკური თანამშრომლობის მიმდინარეობა და გამოთქვეს დაინტერესება განავითარონ ამ მხრივ ურთიერთობები, მათ შორის  ორი ქვეყნის უწყებებს შორის ეკონომიკური დიპლომატიის ინსტრუმენტების ეფექტური გამოყენების გზით.

ხაზი გაესვა ორ ქვეყანას შორის მაღალი დონის ვიზიტების აქტიურ დინამიკას და მომავალში მისი შენარჩუნების აუცილებლობას.