დავით ზალკალიანი: ჩვენ გვაქვს სერიოზული მხარდაჭერა ნატოს პარტნიორი ქვეყნების მხრიდან, რაც გაჟღერდა გენერალური მდივნის ვიზიტის დროსაც, რომ საქართველო აუცილებლად გახდება ნატოს წევრი

25.03.2019 თბილისი- საგარეო საქმეთა მინისტრმა დავით ზალკალიანმა საქართველოში ნატოს გენერალური მდივნის იენს სტოლტენბერგის ვიტიზი შეაფასა. საგარეო საქმეთა მინისტრმა კიდევ ერთხელ ხაზი გაუსვა ნატო-საქართველოს დატვირთული დღის წესრიგის მნიშვნელობას.  

„ვფიქრობ, რომ ნატოს გენერალური მდივნის ვიზიტი უაღრესად საჭირო იყო როგორც დროის, ასევე გზავნილების თვალსაზრისით. მისი მხრიდან პოზიტიურად იყო შეფასებული ყველა ის რეფორმა, რომელსაც საქართველო ახორციელებს როგორც თავდაცვის სფეროში, ისე პოლიტიკური და ეკონომიკური განვითარების კუთხით, დემოკრატიული ინსტიტუტების გაძლიერების თვალსაზრისით. ჩვენ გვაქვს ძალიან სერიოზული მხარდაჭერა ნატოს პარტნიორი ქვეყნების მხრიდან, რაც გაჟღერდა გენერალური მდივნის ვიზიტის დროს, რომ საქართველო აუცილებლად გახდება ნატოს წევრი, რაც ასევე არის ასახული ნატოს ბოლო სამიტის გადაწყვეტილებებში. ვიზიტის ფარგლებში საუბარი შეეხო, ასევე შავი ზღვის რეგიონის უსაფრთხოების საკითხებს. ეს თემა იქნება უახლოესი დღეების განმავლობაში საქართველო-ნატოს ურთიერთობის დღის წესრიგის ერთ-ერთი მთავარი  მიმართულება. ბრიუსელში ნატო-საქართველოს კომისიის ფარგლებში, ცალკე საქართველოზე იქნება მსჯელობა ზუსტად შავი ზღვის უსაფრთხოების კონტექსტში. ეს თემა არის საქართველო-ნატოს დღის წესრიგის ერთ-ერთი მთავარი პრიორიტეტი. შავი ზღვა არის მოქცეული თავად ნატოს მთავარ აქცენტებში და ფოკუსში, საქართველო როგორც ამ რეგიონის ერთ-ერთი მნიშვნელოვანი ქვეყანა და პარტნიორი.“-განაცხადა საგარეო საქმეთა მინისტრმა.  

დავით ზალკალიანმა ხაზი გაუსვა ნატოს ღია კარის პოლიტიკას, მან ასევე აღნიშნა, რომ ნატოში ინტეგრაციას პრიორიტეტული ადგილი უჭირავს საქართველოს საგარეო პოლიტიკის სტრატეგიაში, რომელიც უახლოეს მომავალში დამტკიცდება საქართველოს მთავრობის მიერ.    მინისტრის შეფასებით, ასევე უაღრესად მნიშვნელოვანია ნატო-საქართველოს წვრთნები, რომელიც უპრეცედენტოა თავისი შინაარსით. საგარეო საქმეთა მინისტრის შეფასებით ასევე მნიშვნელოვანია, რომ გენერალური მდივნის ვიზიტი, ისევე როგორც ნატოსთან დაკავშირებული აქტივობები, გააზრებული იქნას ნატო-ს მოახლებული საიუბილეო მინისტერიალის ფარგლებში.
 
„წვრთნები, რომელიც პირველად ჩატარდა წვრთნისა და შეფასების ცენტრის ეგიდით  არის უაღრესად მნიშვნელოვანი საქართველოსთვის, მსგავსი სახის წვრთნები საქართველოში ნატოს ეგიდით არ ჩატარებულა. აღნიშნული ვიზიტი, ისევე როგორც ამ დღეების განმალობაში მთლიანად ნატო-საქართველოს ურთიერთობის დღის წესრიგი უნდა იქნას აღქმული  ნატოს მოახლოებული მინისტერიალის ფარგლებში.   მინდა ხაზგასმით აღვნიშნო, რომ  ასეთი დატვირთული დღის წესრიგი ნატოსთან არის ჩვენი გააზრებული საგარეო პოლიტიკის სტრატეგიის ნაწილი, სადაც ერთ-ერთ პრიორიტეტული ადგილი სწორედ ნატოსთან ინტეგრაციას უჭირავს.  ჩვენ ზუსტად ვიცით, როგორ მივდივართ, რა გზით მივდივართ, რა თანმიმდევრობით მივდივართ და ყველა ეს ნაბიჯი არის შეთანხმებული ჩვენს პარტნიორებთან, ერთ დღე-ღამეში არ ხდება მსგავსი მაღალი დონის ღონისძიებების დაგეგმვა“ -განაცხადა დავით ზალკალიანმა.

საგარეო საქმეთა მინისტრმა აღნიშნული შეფასება თბილისის საერთაშორისო აეროპორტში გააკეთა, სადაც ვიზიტის დასრულების შემდეგ გაიმართა ნატო-ს გენერალური მდივნის გაცილების ოფიციალური ცერემონია .