ეუთო-ს მუდმივი საბჭოს სხდომაზე ქართულმა მხარემ ექიმ ვაჟა გაფრინდაშვილის უკანონო დაკავებაზე ისაუბრა

2019 წლის 12 დეკემბერს, ვენაში, ეუთო-ს მუდმივ საბჭოზე საქართველოს ელჩმა დავით დონდუამ ადამიანის უფლებათა დღესთან დაკავშირებით, განცხადება გააკეთა.

ადამიანის უფლებათა დღე მსოფლიოს მასშტაბით 10 დეკემბერს აღინიშნება. სწორედ ამ დღეს, 1948 წელს, გაერო-ს გენერალურმა ასამბლეამ მიიღო ადამიანის უფლებათა საყოველთაო დეკლარაცია. 

დავით დონდუამ კიდევ ერთხელ დაადასტურა ქართული მხარის მზაობა დაიცვას ადამიანის უფლებები და ფუნდამენტური თავისუფლებები. მან ასევე დეტალურად ისაუბრა იმ გამოწვევებზე, რომლებიც საქართველოს ტერიტორიების ოკუპაციიდან მომდინარეობს.

ოკუპირებულ აფხაზეთისა და ცხინვალის რეგიონებში, უსაფრთხოებისა და ადამიანის უფლებათა მდგომარეობა სულ უფრო მძიმდება. ადგილი აქვს ადამიანთა გატაცებას, წამებას, უკანონო დაკავებას, ქონების ხელყოფასა და ეთნიკური ნიშნით დევნას. ამასთან, ხელოვნური ბარიერების აღმართვისა და ე.წ. გადასასვლელი პუნქტების დახურვით, იზღუდება თავისუფალი მიმოსვლის უფლება. ხოლო ათიათასობით იძულებით ადგილნაცვალ პირს, კვლავაც არ ეძლევა თავიანთ სახლებში უსაფრთხოდ და ღირსეულად დაბრუნების საშუალება - აღნიშნა მან.

საქართველოს წარმომადგენელმა ეუთო-ს მუდმივი საბჭოს წევრებს კიდევ ერთხელ შეახსენა, რომ საქართველოს ორთოპედთა და ტრავმატოლოგთა ასოციაციის პრეზიდენტი, ექიმი ვაჟა გაფრინდაშვილი 9 ნოემბერს გატაცებულ იქნა საოკუპაციო ძალების მიერ და იგი ამ დრომდე რჩება უკანონო პატიმრობაში.

სხდომის ფარგლებში, ქართულმა მხარემ მადლობა გადაუხადა საერთაშორისო თანამეგობრობას, როგორც ორმხრივ, ასევე, საერთაშორისო ორგანიზაციების ფარგლებში გამოხატული მტკიცე მხარდაჭერისთვის.