კორეის რესპუბლიკის ეროვნულ ბიბლიოთეკაში ქართული ხელნაწერების გამოფენა „ვეფხისტყაოსანი - ევროპა და აზია ერთ წიგნში“ გაიხსნა

9 სექტემბერს, საქართველოს საელჩოს ორგანიზებით, კორეის რესპუბლიკის ეროვნულ ბიბლიოთეკაში ოფიციალურად გაიხსნა ქართული ხელნაწერების გამოფენა „ვეფხისტყაოსანი - ევროპა და აზია ერთ წიგნში“.
 
ექსპოზიციის ფარგლებში, წარმოდგენილია კორნელი კეკელიძის სახელობის საქართველოს ხელნაწერთა ეროვნული ცენტრში დაცული ცნობილი ქართული პოემის „ვეფხისტყაოსნის“ უძველესი ხელნაწერების და ილუსტრაციების ნიმუშები (ასლები). დამთვალიერებლებს, შესაძლებლობა აქვთ, ასევე იხილონ „ვეფხისტყაოსნის“ კორეულენოვანი გამოცემები.
 
ღონისძიებაზე დამსწრე საზოგადოებას სიტყვით მიმართეს,  საქართველოს საგანგებო და სრულუფლებიანმა ელჩმა,  ოთარ ბერძენიშვილმა და  კორეის ეროვნული ბიბლიოთეკის დირექტორმა,  სეო ჰეი რანმა.
 
კორეის ეროვნულ ბიბლიოთეკაში, გამოფენის თემატიკის გათვალისწინებით, აგრეთვე გამოიფინა ქართული ეროვნული სამოსი.
 
პროექტი ხორციელდება საქართველოს საელჩოს,  კორეის ეროვნული ბიბლიოთეკის ორგანიზებით და კორნელი კეკელიძის სახელობის საქართველოს ხელნაწერთა ეროვნული ცენტრთან თანამშრომლობით.
 
ოფიციალური გახსნის ცერემონიას სპეციალური სტუმრის სტატუსით ესწრებოდნენ  იონსეის და კორეის უნივერისტეტის პროფესორები,  ჩო ჯუკ-ვანი და ჰო სუნგ-ჩული, რომლებმაც კორეულ ენაზე თარგმნეს „ვეფხისტყაოსანი“.