საქართველოს წმინდა საყდრის საგარეო საქმეთა მინისტრი ვიზიტით ეწვევა

2018 წლის 21-24 ოქტომბერს, საქართველოს ოფიციალური ვიზიტით ეწვევა წმინდა საყდრის საგარეო საქმეთა მინისტრი, პოლ რიჩარდ გალაჰერი.

საგარეო საქმეთა სამინისტროში გაიმართება საგარეო საქმეთა მინისტრის დავით ზალკალიანის შეხვედრა ვატიკანის საგარეო საქმეთა მინისტრთან.  შეხვედრის დასრულებისას, მინისტრები ერთობლივ პრესკონფერეციას გამართავენ.

ვიზიტის ფარგლებში, პოლ რიჩარდ გალაჰერი ასევე  შეხვდება სრულიად საქართველოს კათოლიკოს პატრიარქს ილია მეორეს, საქართველოს პრეზიდენტს გიორგი მარგველაშვილს, პრემიერ მინისტრსა მამუკა ბახტაძესა და პარლამენტის თავმჯდომარეს ირაკლი კობახიძეს.

ვატიკანის საგარეო საქმეთა მინისტრი პატივს მიაგებს საქართველოს ერთიანობისთვის დაღუპული მებრძოლების ხსოვნას და გვირგვინით შეამკობს გმირთა მემორიალს. იგი  ასევე ეწვევა საოკუპაციო ხაზთან მდებარე სოფელ ხურვალეთს და ადგილზე გაეცნობა იქ არსებულ ვითარებას. მინისტრი თბილისის სახელმწიფო უნივერსიტეტში შეხვედრას გამართავს, რომელსაც პროფესორ მასწავლებლები, სტუდენტები, მთავრობის წარმომადგენლები, დიპლომატიური კორპუსის წარმომადგენლები და სასულიერო პირები დაესწრებიან.

პოლ რიჩარდ გალაჰერი, საქართველოში ვიზიტის ფარგლებში ასევე მცხეთას ეწვევა და სვეტიცხოველსა და ჯვრის მონასტერს მოინახულებს.