სომხეთში „ვეფხისტყაოსნის“ სპეციალური გამოცემის პრეზენტაცია გაიმართა

5.11.2019 სომხეთი - საქართველოს კ. კეკელიძის სახელობის ხელნაწერთა ნაციონალური ცენტრისა და ეროვნული ბიბლიოთეკის მხარდაჭერით საელჩოში შედგა შოთა რუსთაველის „ვეფხისტყაოსნის“ სპეციალური გამოცემის პრეზენტაცია. 

ღონისძიებას ესწრებოდნენ ერევნის სახელმწიფო უნივერსიტეტის რექტორი გეღამ გევორგიანი, სომხეთის ხელნაწერთა ინსტიტუტის „მატენადარანის“ დირექტორი ვაჰან ტერ-ღევონდიანი, სომხეთში აკრედიტებული ელჩები, ქართული სათვისტომო ივერიას წევრები, განათლების და კულტურის სფეროს მოღვაწეები. საგანგებო და სრულუფლებიანი ელჩის გიორგი საგანელიძის მისასალმებელი სიტყვის შემდეგ კ. კეკელიძის სახელობის ხელნაწერთა ნაციონალური ცენტრის დირექტორმა ზაზა აბაშიძემ და ეროვნული ბიბლიოთეკის დირექტორის მოადგილემ ლევან თაქთაქიშვილმა მოკლე ექსკურსი გააკეთეს შოთა რუსთაველის „ვეფხისტყაოსნის“ და ქართული ხელნაწერების თაობაზე, რის შემდეგაც სტუმრებმა უყურეს მოკლე ფილმს ქართული დამწერლობის შესახებ და დააგემოვნეს ქართული ღვინო და კერძები.