თურქეთში საქართველოს ელჩი და სტამბოლში საქართველოს გენერალური კონსული ქართული დიასპორის წარმომადგენლებს შეხვდნენ

21.01.2020 თურქეთი - ქ. სტამბოლში სამუშაო ვიზიტის ფარგლებში, საქართველოს ელჩმა გიორგი ჯანჯღავამ და სტამბოლში საქართველოს გენერალურმა კონსულმა ინგა კიკვაძემ ნაზიმ ჰიქმეთის სახელობის კულტურისა და ხელოვნების ცენტრში და ქართულ სახლში “გალაკტიონი” შეხვედრები გამართეს ქართული დიასპორული ორგანიზაციების ხელმძღვანელებთან და წევრებთან, ასევე სტამბოლში მცხოვრებ საქართველოს მოქალაქეებთან. 

შეხვედრებზე კიდევ ერთხელ ხაზი გაესვა დიასპორასთან ურთიერთობის მნიშვნელობას და აღინიშნა, რომ როგორც საელჩოს, ასევე გენერალური საკონსულოს საქმიანობის ერთ-ერთი მნიშვნელოვანი პრიორიტეტია დიასპორის წარმომადგენლებთან აქტიური კომუნიკაცია და მათი დახმარება. შეხვედრისას, ქართული დიასპორის წარმომადგენლებს ასევე მიეწოდათ ინფორმაცია საქართველოს ხელისუფლების საქმიანობისა და სამომავლო გეგმების თაობაზე.
ამასთან, 15 იანვარს, ქ. გებზეში, საქართველოს ელჩმა გიორგი ჯანჯღავამ შეხვედრა გამართა მარმარას რეგიონის ქართული დიასპორის წარმომადგენლებთან, სადაც ზემოაღნიშნულ საკითხებთან ერთად განხილულ იქნა მომავალი თანამშრომლობის პერსპექტივები და ერთობლივი პროექტების განხორციელების შესაძლებლობები.
თავის მხრივ, ქართული დიასპორული ორგანიზაციების ხელმძღვანელებმა და წევრებმა, ასევე სტამბოლში მცხოვრებმა საქართველოს მოქალაქეებმა მადლობა გადაუხადეს როგორც საქართველოს საგარეო საქმეთა სამინისტროს, ასევე საქართველოს საელჩოსა და სტამბოლში საქართველოს გენერალურ საკონსულოს გამოჩენილი ყურადღებისთვის და გამოთქვეს მჭიდრო თანამშრომლობის გაგრძელების სურვილი.