ზურაბ პოლოლიკაშვილი არგენტინის პრეზიდენტს შეხვდა

29.09.2017 არგენტინა - ესპანეთის სამეფოში საქართველოს ელჩი და მსოფლიო ტურიზმის ორგანიზაციის არჩეული გენერალური მდივანი ზურაბ პოლოლიკაშვილი არგენტინის პრეზიდენტს მაურისიო მაკრის შეხვდა.

არგენტინის პრეზიდენტმა ზურაბ პოლოლიკაშვილს მიულოცა გაეროს ტურიზმის მსოფლიო ორგანიზაციაში გენერალურ მდივნად არჩევა და მომავალ საქმიანობაში წარმატება უსურვა.

საქართველოს ელჩმა მაურისიო მაკრის გააცნო ორგანიზაციაში მუშაობის პრიორიტეტები და ამ მიმართულებით განიხილა არგენტინასთან თანამშრომლობის პერსპექტივები.

არგენტინაში ვიზიტის ფარგლებში საქართველოს ელჩმა ესპანეთის სამეფოში შეხვედრები გამართა ასევე არგენტინის ტურიზმის მინისტრთან და ბუენოს-აირესის ტურიზმის ხელმძღვანელთან.

აღსანიშნავია, რომ ზურაბ პოლოლიკაშვილი არგენტინას მენდოსაში ღვინის გლობალური ტურიზმის კონფერენციის ფარგლებში სტუმრობს. საქართველოს ელჩი დღეს კონფერენციის ოფიციალური გახსნის ცერემონიაში მიიღებს მონაწილეობას. 

ზურაბ პოლოლიკაშვილი არგენტინაში ვიზიტის შემდეგ ურუგვაის ესტუმრება, სადაც დაგეგმილია მისი შეხვედრები ურუგვაის პრეზიდენტთან, საგარეო საქმეთა და ტურიზმის მინისტრებთან.