​მინისტრის მოადგილის თეიმურაზ ჯანჯალიასა და საქართველოში უკრაინის საქმეთა დროებითი რწმუნებულის შეხვედრა

2022 წლის 5 აპრილს, გაიმართა მინისტრის მოადგილის, თეიმურაზ ჯანჯალიას, შეხვედრა საქართველოში უკრაინის საქმეთა დროებით რწმუნებულთან ანდრიი კასიანოვთან. 

შეხვედრაზე, ქართულმა მხარემ შეშფოთება გამოთქვა უკრაინული მხარის მიერ გავრცელებულ ინფორმაციაზე, თითქოს საქართველოს სპეციალურ სამსახურებსა და რუსეთის ფედერაციის შესაბამის სამსახურებს შორის ფარული კავშირები არსებობს და სანქცირებული კონტრაბანდული ტვირთები საქართველოს გავლით გადაიზიდება. ცალსახად აღინიშნა, რომ ხსენებული ინფორმაცია სიმართლეს არ შეესაბამება, რომ მსგავსი ტიპის განცხადებები ორი ქვეყნის მეგობრულ ურთიერთობებს  აზარალებს ისევე, როგორც საფრთხის შემცველია საქართველოს უსაფრთხოებისთვის. 
შეხვედრაზე, უკრაინელ დიპლომატს გადასცეს საქართველოს შესაბამისი უწყებების - უსაფრთხოების სამსახურის და ფინანსთა სამინისტროს - პოზიციები. უკრაინელ დიპლომატს ასევე გადაეცა ქართული მხარის მოთხოვნა შესაბამისი მტკიცებულებების წარმოდგენის თაობაზე. აღსანიშნავია, რომ უკრაინულმა მხარემ ვერ წარმოადგინა რაიმე სახის  მტკიცებულება გავრცელებულ ინფორმაციასთან დაკავშირებით. 

უკრაინის საქმეთა დროებითმა რწმუნებულმა კიდევ ერთხელ გამოთქვა მადლიერება საქართველოს მიერ უკრაინისადმი  გამოხატული მხარდაჭერისა და სოლიდარობისათვის, მათ შორის, ჰუმანიტარული დახმარებისთვის, უკრაინელ ლტოლვილთა მიღების საქმეში გაწეული წვლილისა და საქართველოს მტკიცე პოზიციისთვის საერთაშორისო ორგანიზაციების ფარგლებში უკრაინის მხარდამჭერი რეზოლუციებისა და განცხადებების  თვალსაზრისით. 

თავის მხრივ, ქართულმა მხარემ კიდევ ერთხელ გამოხატა  შეშფოთება უკრაინაში მიმდინარე პროცესებთან დაკავშირებით, რაც საფრთხეს წარმოადგენს არა მხოლოდ უკრაინისთვის, არამედ ევროპისა და მთელი მსოფლიოსთვის. 

ხაზი გაესვა საქართველოსა და უკრაინის მეგობრობასა და სტრატეგიულ პარტნიორობას და ამ ურთიერთობების კიდევ უფრო განმტკიცების მნიშვნელობას ორივე ქვეყნისთვის. 

მინისტრის მოადგილემ კვლავ დააფიქსირა ქართული მხარის მზაობა, უკრაინისა და უკრაინელი ხალხის მხარდაჭერის გაგრძელებაზე როგორც ორმხრივ, ისე მრავალმხრივ ფორმატებში.