საქართველოსა და თურქეთს შორის ჯანდაცვის სფეროში თანამშრომლობის შესახებ ოქმს მოეწერა ხელი

8 დეკემბერს, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სახელით, საქართველოს ელჩმა, გიორგი ჯანჯღავამ, თურქეთის რესპუბლიკის „საერთაშორისო სამედიცინო მომსახურების სააგენტოს“ (USHAŞ) მმართველთა საბჭოს თავმჯდომარესთან, სალიჰ ქენან შაჰინთან ერთად ხელი მოაწერა ოქმს, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და „საერთაშორისო სამედიცინო მომსახურების სააგენტოს“ შორის ჯანდაცვის სფეროში თანამშრომლობის შესახებ.

ზემოაღნიშნული ოქმის მიზანია, ჯანდაცვის სფეროში ორმხრივად შეთანხმებული პროექტების განხორციელება, ონკოლოგიური პაციენტებისთვის თურქეთის რესპუბლიკაში სამედიცინო მომსახურების მიღება, მედიკამენტებითა და სამედიცინო აღჭურვილობებით მომარაგება, სამედიცინო ტურიზმისა და განათლების მიმართულებით თანამშრომლობის ხელშეწყობა, ასევე, სამედიცინო ტექნოლოგიების სფეროებში სიახლეების თაობაზე საუკეთესო პრაქტიკის გაზიარება.

აღსანიშნავია, რომ ხელმოწერის ცერემონიაზე, ონლაინ რეჟიმში, ასევე, მონაწილეობა მიიღეს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ, გიორგი წოწკოლაურმა და სამინისტროს ადმინისტრაციის უფროსის მოვალეობის შემსრულებელმა, თინათინ ხარძიანმა.

ამასთან, გამართული ღონისძიების ფარგლებში, მხარეებმა წარმატებულად შეაფასეს საქართველოსა და თურქეთს შორის, ჯანდაცვის სფეროში არსებული თანამშრომლობა და ასევე, აქცენტები გააკეთეს მომავალ ახალ პერსპექტივებზე.

საგულისხმოა, რომ ჯანდაცვის სფეროში თანამშრომლობის შესახებ ოქმის ხელმოწერის მიზანშეწონილობის თაობაზე გადაწყვეტილება მიღებულ იქნა 2019 წლის 31 ოქტომბერს, საქართველოს პრემიერ-მინისტრის, გიორგი გახარიას ანკარაში ვიზიტის ფარგლებში, თურქეთის რესპუბლიკის პრეზიდენტთან, რეჯეფ თაიფ ერდოღანთან გამართული შეხვედრის დროს.