ბათუმი საქართველოს საპატიო კონსულების კონფერენციას მასპინძლობს

2023 წლის 9-11 სექტემბერს  ბათუმი საქართველოს საპატიო კონსულების კონფერენციას მასპინძლობს. საქართველოს საგარეო საქმეთა სამინისტროს ორგანიზებით გამართულ ღონისძიებაში მსოფლიოს ორმოცზე მეტი ქვეყნის საპატიო კონსული მონაწილეობს.
 
კონფერენციას 11 სექტემბერს ოფიციალურად გახსნის საგარეო საქმეთა მინისტრი  ილია დარჩიაშვილი. დამსწრე საზოგადოებას მისასალმებელი სიტყვით მიმართავენ აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე და გერმანიაში საქართველოს საპატიო კონსული იენს გუნთერი.
 
ღონისძიების ფარგლებში გაიმართება თემატური პანელები, რომლებიც პარტნიორ ქვეყნებთან სავაჭრო-ეკონომიკური ურთიერთობების გაღრმავების, უცხოური ინვესტიციების მოზიდვის, საქართველოს ეკონომიკური და კულტურული დიპლომატიის ხელშეწყობის, ტურისტული პოტენციალის გაძლიერების, საზღვაო სფეროს განვითარებისა და განათლებისა და მეცნიერების სფეროში  შესაძლებლობათა გაფართოების საკითხებს დაეთმობა.
 
კონსულარიუმის ფარგლებში ცალკე სამუშაო სესია დაეთმობა აჭარის ავტონომიური რესპუბლიკის შესახებ პრეზენტაციას. კერძოდ, საპატიო კონსულები გაეცნობიან აჭარის ეკონომიკურ და საინვესტიციო პოტენციალს.  კონფერენციის მონაწილეები მიიღებენ ინფორმაციას აჭარის, როგორც ოთხსეზონიანი კურორტის განვითარების მიმართულებით განხორციელებული პროექტების შესახებ.   ყურადღება გამახვილდება საქართველოს, როგორც შავი ზღვის რეგიონის ქვეყნის, სანაოსნო შესაძლებლობებსა და  ბათუმის საზღვაო პორტის განვითარების პერსპექტივებზე.
 
ვიზიტის ფარგლებში საქართველოს საპატიო კონსულები ბათუმის ღირსშესანიშნაობებსაც დაათვალიერებენ და ბათუმის, როგორც საუკეთესო ტურისტული მიმართულების პოტენციალს გაეცნობიან.
 
აღსანიშნავია, რომ საპატიო კონსულების პირველი კონფერენცია 2022 წელს გაიმართა. დღეისათვის საქართველოს 65 ქვეყანაში 90 საპატიო კონსული ჰყავს. წელს  საქართველოს საპატიო კონსულების ქსელი კიდევ უფრო გაფართოვდა,  კერძოდ, საპატიო კონსულები დაინიშნნენ პოლონეთში, აშშ-სა და ხორვატიაში.  საპატიო კონსულის ინსტიტუტი უმნიშვნელოვანეს როლს ასრულებს პარტნიორ ქვეყნებთან საქართველოს სავაჭრო-ეკონომიკური, სამეცნიერო-ტექნიკური და კულტურული თანამშრომლობის განვითარების, ინვესტიციების მოზიდვისა და ტურიზმის წახალისების თვალსაზრისით. ასევე მნიშვნელოვანია მათი ჩართულობა საქართველოს, როგორც სტაბილური და მიმზიდველი დანიშნულების ადგილის პოპულარიზაციის საქმეში.