წმინდა საყდარი (ვატიკანი)

დიპლომატიური ურთიერთობები საქართველოსა და წმინდა საყდარს შორის დამყარდა 1992 წლის 24 მაისს.

2004 წელს გაიხსნა საქართველოს საელჩო წმინდა საყდართან.

საქართველოში წმინდა საყდრის სადესპანო ფუნქციონირებს 1993 წლიდან.

საქართველოსა და წმინდა საყდარს, ქრისტიანობის დასაწყისიდანვე ურთიერთობების ათასწლოვანი ისტორია აქვთ, რომელიც საუკუნეების მანძილზე შენარჩუნდა, განვითარდა და განმტკიცდა. ისტორიულად, კათოლიკე და მართლმადიდებელი ქრისტიანები ერთმანეთის მხარდამხარ იდგნენ საქართველოს აღმშენებლობის გზაზე. ქართველმა კათოლიკეებმა, სულხან-საბა ორბელიანმა, მიხეილ თამარაშვილმა, ზაქარია ფალიაშვილმა, სტეფანე და პეტრე მელიქიშვილებმა, სიმონ ყაუხჩიშვილმა, პეტრე ოცხელმა მნიშვნელოვანი როლი შეასრულეს საქართველოში კულტურის, განათლების და მეცნიერების  განვითარებაში.

დღეს, საქართველოსა და ვატიკანს მჭიდრო პოლიტიკური ურთიერთობები აკავშირებთ. წმინდა საყდარი მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში. ვატიკანი გმობს საქართველოს ოკუპირებულ ტერიტორიებზე უსაფრთხოების, ჰუმანიტარული და ადამიანის უფლებათა კუთხით არსებულ მძიმე ვითარებას.

1999 წელს, საქართველოს ისტორიული ვიზიტით ეწვია რომის პაპის იოანე პავლე II.

ამასთან, ბოლო წლებში, განხორციელდა არაერთი ორმხრივი უმაღლესი დონის ვიზიტი, რაც ქვეყნებს შორის მეგობრული ურთიერთობების გაღრმავების დასტურია: 2016 წელს საქართველოს ეწვია რომის პაპი ფრანცისკე; 2019 წელს შედგა ვატიკანის სახელმწიფო მდივნის (პრემიერ-მინისტრი) კარდინალ პიეტრო პაროლინის ვიზიტი; 2021 წლის ივნისში, განხორციელდა საქართველოს პრეზიდენტის ოფიციალური ვიზიტი წმინდა საყდარში, რომლის დროსაც პირველად მოეწერა ხელი ურთიერთთანამშრომლობის მემორანდუმებს განათლებისა და კულტურის სფეროებში; 2023 წელს ვატიკანს სტუმრობდნენ საქართველოს პარლამენტის თავმჯდომარე და საგარეო საქმეთა მინისტრი.

საქართველოსა და ვატიკანს შორის თანამშრომლობა ძალიან აქტიურია განათლებისა და კულტურის სფეროებში, განსაკუთრებით საუნივერსიტეტო და სამეცნიერო მიმართულებებით: ქართველ სტუდენტებსა და მეცნიერებს შეუძლიათ სამეცნიერო-კვლევითი საქმიანობის მიზნით ეწვიონ ვატიკანის უნიკალურ არქივებსა და წიგნთსაცავებს; საშუალება ეძლევათ სხვადასხვა პონტიფიკალურ უნივერსიტეტებში შეისწავლონ ჰუმანიტარული, ისტორიული თუ რელიგიური მეცნიერებები.

ბოლო წლებში, ვატიკანში განხორციელდა ისტორიული მნიშვნელობის კულტურული ღონისძიებები. 2023 წლის ნოემბერში, ვატიკანის ერთ-ერთ თვალსაჩინო ადგილას, ივერიის ღვთისმშობლის სასწაულმოქმედი ხატის მოზაიკური პანოს საზეიმო ინაუგურაცია გაიმართა. ივერიის ღვთისმშობლის მოზაიკური ფრესკის ვატიკანში აღმართვა საქართველოსა და წმიდა საყდარს შორის მრავალწლიანი აქტიური მოლაპარაკებების შედეგად გადაწყდა. ღონისძიებაში, მონაწილეობა მიიღეს საქართველოს საგარეო საქმეთა მინისტრმა, ვატიკანის ქალაქ-სახელმწიფოს წარმომადგენლებმა და საქართველოს საპატრიარქოს დელეგაციის წევრებმა.

2022 წლის ივნისში, ვატიკანის სიქსტის კაპელაში სამების ტაძრის საპატრიარქოს გუნდის კონცერტი გაიმართა. სიქსტის კაპელაში პირველად გაჟღერდა ქართული პოლიფონია, რაც განსაკუთრებული მნიშვნელობისაა, ვინაიდან უცხოური კულტურის წარმოსაჩენი კონცერტები კაპელაში თითქმის არასდროს იმართება.