ალექსანდრე ხვთისიაშვილმა კამბოჯის საგარეო საქმეთა და საერთაშორისო თანამშრომლობის სამინისტროს სახელმწიფო მდივანთან ვირტუალური შეხვედრა გამართა
2024 წლის 2 თებერვალს, საქართველოს საგარეო საქმეთა მინისტრის მოადგილემ, ალექსანდრე ხვთისიაშვილმა, ვირტუალურ ფორმატში შეხვედრა გამართა კამბოჯის საგარეო საქმეთა და საერთაშორისო თანამშრომლობის სამინისტროს სახელმწიფო მდივანთან, ჯაიმ ვიდჰიასთან.
მხარეებმა განიხილეს ორ ქვეყანას შორის არსებული ორმხრივი და მრავალმხრივი ურთიერთობების აქტუალური საკითხები და სხვადასხვა სფეროში თანამშრომლობის განვითარების პერსპექტივები. ამასთან, საუბარი შეეხო ბოლო პერიოდში საერთაშორისო და რეგიონის მასშტაბით მიმდინარე მოვლენებს.
კამბოჯის მხარემ კვლავ დაადასტურა ურყევი მხარდაჭერა საქართველოს სუვერენიტეტისა და ტერიტორიული მთლიანობის მიმართ საერთასორიშოდ აღიარებულ საზღვრებში.
შეხვედრის ფარგლებში საქართველოს საგარეო საქმეთა მინისტრის მოადგილემ და კამბოჯის საგარეო საქმეთა და საერთაშორისო თანამშრომლობის სამინისტროს სახელმწიფო მდივანმა ხელი მოაწერეს „ურთიერთგაგების მემორანდუმს საქართველოს საგარეო საქმეთა სამინისტროსა და კამბოჯის სამეფოს საგარეო საქმეთა და საერთაშორისო თანამშრომლობის სამინისტროს შორის ორმხრივი კონსულტაციების დაარსების შესახებ“.
ორივე მხრიდან გამოითქვა მზადყოფნა ახლო მომავალში პოლიტიკური კონსულტაციების პირველი რაუნდის ჩატარებასთან დაკავშირებით.
