Kings Garden Villa, Block 101, Xiao Yun Road 18, Chaoyang District, Beijing
ორ ქვეყანას შორის, დიპლომატიური ურთიერთობების დამყარების ოფიციალური თარიღი გახლავთ 1992 წლის 9 ივნისი. ჩინეთის სახალხო რესპუბლიკა იყო ერთ-ერთი პირველი სახელმწიფო, რომელმაც აღიარა საქართველოს დამოუკიდებლობა. ქ. თბილისში ჩინეთის საელჩო გაიხსნა 1992 წელს, ხოლო ქ. პეკინში საქართველოს საელჩო 2004 წელს დაარსდა. ამ ფაქტის გათვალისწინებით, საქართველოსა და ჩინეთს შორის დაიწყო ინტენსიური თანამშრომლობა, რომელიც მოიცავს სხვადასხვა სფეროებს. ჩამოყალიბებულია თანამშრომლობის ისეთი მექანიზმები, როგორიცაა ორი ქვეყნის საგარეო უწყებებს შორის რეგულარული პოლიტიკური კონსულტაციები და მთავრობათაშორისო ეკონომიკური კომისია.
ბოლო წლების განმავლობაში განხორციელდა ჩინური ინვესტიციების მნიშვნელოვანი ზრდა საქართველოს ეკონომიკაში. 25-მდე ჩინური კომპანია უკვე წარმატებულად საქმიანობს საქართველოში ისეთ სექტორებში როგორიცაა: მშენებლობა, ინფრასტრუქტურა, ენერგეტიკა, და სხვა. იზრდება ორმხრივი ვაჭრობა, რასაც მნიშვნელოვნად შეუწყო ხელი 2017 წელს გაფორმებულმა ხელშეკრულებამ თავისუფალი ვაჭრობის შესახებ.
ვითარდება ურთიერთობები კულტურისა და განათლების სფეროებში. ასევე, აქტიურად ვითარდება თანამშრომლობა ტურიზმის სფეროში - 2011 წლის 9 ივნისიდან დაინიშნა პირდაპირი ავიარეისი თბილისი-ურუმჩის მიმართულებით, ხოლო 2023 წლის 11 სექტემბრიდან, ქართულმა მხარემ ჩინელი ტურისტებისთვის უვიზო რეჟიმი დააწესა. აღსანიშნავია ის ფაქტიც, რომ 2012 წლის თებერვლიდან, ჩინეთის მთავრობის მხრიდან საქართველოს მინიჭებული აქვს „ტურიზმისთვის ხელსაყრელი ქვეყნის სტატუსი“.
ორ ქვეყანას შორის, ურთიერთობების სულ ახალი ეტაპი დაიწყო 2023 წლიდან მას შემდეგ, რაც ჩინეთის სახალხო რეპუბლიკაში, საქართველოს პრემიერ მინისტრის, ირაკლი ღარიბაშვილის ვიზიტისას, შედგა მისი შეხვედრა ჩინეთის სახალხო რესპუბლიკის პრეზიდენტ, სი ძინპინთან. შეხვედრის შედეგად, მხარეებმა გააკეთეს ოფიციალური განცხადება ორ ქვეყანას შორის სტრატეგიული თანამშრომლობის დაწყებასთან დაკავშირებით. სტრატეგიული თანამშრომლობა ითვალისწინებს საქართველოსა და ჩინეთის ურთიერთობების უფრო ინტენსიურ გაღრმავებას, რამაც ხელი უნდა შეუწყოს ორი ქვეყნის კეთილდღეობას.
2023 წლის 10 მაისს საგარეო საქმეთა მინისტრის მოადგილე, ალექსანდრე ხვთისიაშვილი საქართველოში ჩინეთის სახალხო რესპუბლიკის საგანგებო და სრულუფლებიან ელჩს, ჭოუ ციენს შეხვდა. შეხვედრა ჩინეთის მრარის ინიციატივით გაიმართა.
ჩინეთის სახალხო რესპუბლიკაში საქართველოს პრემიერ-მინისტრის, ირაკლი ღარიბაშვილის ვიზიტის ფარგლებში, საქართველოს აჭარის ავტონომიურ რესპუბლიკასა და ჩინეთის სახალხო რესპუბლიკის სიჩუანის პროვინციას შორის მეგობრული ურთიერთობების ჩამოყალიბების შესახებ შეთანხმება გაფორმდა. დოკუმენტს ხელი საქართველოს საგარეო საქმეთა მინისტრმა, ილია დარჩიაშვილმა და სიჩუანის გუბერნატორმა, ჰუან ციანმა მოაწერეს.
2024 წლის 16 აპრილს, საქართველოს საგარეო საქმეთა მინისტრი ილია დარჩიაშვილი ჩინეთის სახალხო რესპუბლიკის მმართველი პარტიის ცენტრალური კომიტეტის საერთაშორისო დეპარტამენტის მინისტრის მოადგილეს, ჩენ ჭოუს და დელეგაციის წევრებს შეხვდა.
