დიპლომატიური ურთიერთობები საქართველოსა და გერმანიის ფედერაციულ რესპუბლიკას შორის დამყარდა 1992 წლის 13 აპრილს, როდესაც საქართველოს ოფიციალური ვიზიტით ეწვია გერმანიის საგარეო საქმეთა ფედერალური მინისტრი ჰანს-დიტრიხ გენშერი.
გერმანიის ფედერაციული რესპუბლიკა იყო პირველი სახელმწიფო, რომელმაც 1992 წელს საელჩო გახსნა თბილისში.
1993 წელს გაიხსნა საქართველოს საელჩო გერმანიის ფედერაციულ რესპუბლიკაში.
ქართულ-გერმანული ურთიერთობები სახელმწიფოთაშორის დონეზე ჯერ კიდევ საქართველოს დემოკრატიული რესპუბლიკის პერიოდს (1918-1921 წ.წ.) უკავშირდება. მას შემდეგ, რაც საქართველომ ხელახლა მოიპოვა დამოუკიდებლობა და დიპლომატიური ურთიერთობები დაამყარა გერმანიასთან, ინტენსიურად განვითარდა მჭიდრო და მრავალგანზომილებიანი თანამშრომლობა პოლიტიკურ, თავდაცვისა და უსაფრთხოების, სავაჭრო-ეკონომიკურ, განვითარების, გარემოს დაცვისა და ენერგეტიკის, სამართალდაცვით, კულტურის, განათლების და მეცნიერების და სხვა სფეროებში. ორმხრივი ურთიერთობების გაღრმავებას ემსახურება უწყებათაშორისი თანამშრომლობა, რომელიც, ასევე, დინამიკურად ვითარდება. საქართველო და გერმანია აქტიურად თანამშრომლობენ საერთაშორისო ორგანიზაციების ფარგლებშიც.
ქვეყნებს შორის პოლიტიკური დიალოგი გაღრმავდა 2018 წელს ქართულ-გერმანულ-ფრანგული სამკუთხედის ჩამოყალიბებით, რომელიც სამი ქვეყნის საგარეო უწყებას შორის პოლიტიკური დიალოგის და სტრატეგიულ საკითხებზე მსჯელობის რეგულარულ ფორმატს წარმოადგენს.
საქართველოსა და გერმანიას შორის მოქმედებს 50-ზე მეტი შეთანხმება, რომელიც მოიცავს ისეთ მიმართულებებს, როგორიცაა ინვესტიციების ხელშეწყობა და ურთიერთდაცვა, შემოსავლებსა და კაპიტალზე ორმაგი დაბეგვრის თავიდან აცილება, ტექნიკური და ფინანსური თანამშრომლობა, თავდაცვა, კულტურის სფეროში თანამშრომლობა, ორგანიზებული დანაშაულისა და ტერორიზმის წინააღმდეგ ბრძოლა და სხვა.
ქვეყნებს შორის ხშირად იცვლება უმაღლესი და მაღალი დონის ვიზიტები საკანონმდებლო და აღმასრულებელი ხელისუფლების წარმომადგენლების მხრიდან. აღსანიშნავია, რომ 2018 წლის აგვისტოში შედგა გერმანიის ფედერალური კანცლერის ოფიციალური ვიზიტი საქართველოში, ხოლო 2019 წელს გაიცვალა ოფიციალური ვიზიტები ორი ქვეყნის პრეზიდენტებს შორის. ამასთან, ბოლო წლებში განხორციელდა საქართველოს პრემიერ-მინისტრის, პარლამენტის თავმჯდომარის, საგარეო საქმეთა და სხვა დარგობრივი მინისტრების არაერთი ოფიციალური თუ სამუშაო ვიზიტი ბერლინში. გერმანიის მხრიდან საქართველოს მტკიცე მხარდაჭერის მკაფიო დადასტურება იყო 2023 წელს გერმანიის საგარეო საქმეთა ფედერალური მინისტრის ოფიციალური ვიზიტი საქართველოში.
აქტიურად მიმდინარეობს საპარლამენტთაშორისო თანამშრომლობა. საქართველოს პარლამენტში შექმნილია გერმანიასთან მეგობრობის საპარლამენტთაშორისო ჯგუფი, ხოლო გერმანიის ბუნდესტაგში მოქმედებს სამხრეთ კავკასიის ქვეყნებთან ურთიერთობების საპარლამენტთაშორისო ჯგუფი. განსაკუთრებით ხშირია ვიზიტების ურთიერთგაცვლა პარლამენტარებს შორის. 2020 წლის 26 ოქტომბერს გერმანიის ბუნდესტაგში დაფუძნდა გერმანულ-ქართული ფორუმი, რომლის მიზანია საქართველო-გერმანიას შორის არსებული ტრადიციულად კარგი ურთიერთობების განმტკიცება და გაფართოება, გერმანიის პოლიტიკურ და საზოგადოებრივ წრეებში საქართველოს შესახებ ცნობადობის ამაღლება, ორ ქვეყანას შორის პოლიტიკური, ეკონომიკური, კულტურული და სამეცნიერო თანამშრომლობის გაძლიერება. ყოველწლიურად ქართველი ახალგაზრდებისათვის გაიცემა ბუნდესტაგის საერთაშორისო საპარლამენტო სტიპენდიები.
დინამიკურად ვითარდება ორმხრივი ეკონომიკური ურთიერთობები. ბოლო წლებში გერმანია მუდმივად ინარჩუნებს ადგილს საქართველოს უმსხვილეს სავაჭრო პარტნიორების ათეულში. საქართველოში წარმატებით საქმიანობს არაერთი გერმანული კომპანია, მათ შორის „ჰაიდელბერგცემენტი“, „კნაუფი“, „ჰენკელი“ და ა.შ. ერთობლივად ორგანიზებული ბიზნეს-ფორუმები, სავაჭრო მისიები და ბიზნეს-შეხვედრები მიზნად ისახავს გერმანიის საქმიანი წრეების დაინტერესებას საქართველოს ეკონომიკური პოტენციალით. ამავე მიზანს ემსახურება საქართველოში მოქმედი გერმანიის ეკონომიკური გაერთიანება, რომელსაც სამხრეთ კავკასიის რეგიონში გერმანიის სავაჭრო-სამრეწველო პალატის წარმომადგენლობის სტატუსი აქვს.
ქართული მხარე რეგულარულად მონაწილეობს გერმანიაში სხვადასხვა საერთაშორისო გამოფენაში. 2023 წლის მარტში საქართველო წარმატებით წარსდგა მსოფლიოში ერთ-ერთი ყველაზე მასშტაბური ტურისტული გამოფენა-ბაზრობის „ITB Berlin“ ოფიციალური მასპინძელი ქვეყნის რანგში.
საქართველოში მრავალი წელია ნაყოფიერად საქმიანობენ გერმანიის საერთაშორისო განვითარების საზოგადოება (GIZ) და გერმანიის რეკონსტრუქციის საკრედიტო ბანკი (KfW), რომლებიც ტექნიკური და ფინანსური თანამშრომლობის ფარგლებში ახორციელებენ პროექტებს მდგრადი განვითარების, დემოკრატიის, სამოქალაქო საზოგადოების, საჯარო მმართველობის, ადგილობრივი თვითმართველობის განვითარების, კანონის უზენაესობის, ენერგეტიკისა და ენერგოეფექტურობის, გარემოს დაცვითი პოლიტიკის და სხვა პრიორიტეტულ სფეროებში. ორ წელიწადში ერთხელ იმართება საქართველოსა და გერმანიას შორის სამთავრობო მოლაპარაკებები, რომელთა მიზანს წარმოადგენს განვითარების სფეროში თანამშრომლობის მიმდინარეობისა და სამომავლო გეგმების განხილვა.
აქტიურად მიმდინარეობს თანამშრომლობა გერმანიის წამყვან პოლიტიკურ (ფრიდრიხ ებერტის, კონრად ადენაურის, ჰაინრიხ ბიოლის, ფრიდრიხ ნაუმანის) ფონდებთან. საქართველოს საელჩო ბერლინში კონრად ადენაუერის ფონდთან თანამშრომლობით ახორციელებს პროექტს „ფოკუსი საქართველოზე“, რომლის ფარგლებშიც იმართება ღონისძიებები და თემატური დისკუსიები საქართველოსა და გერმანიის ხელისუფლების წარმომადგენლებისა და ექსპერტების მონაწილეობით.
მრავალფეროვანია ქართულ-გერმანული თანამშრომლობა განათლების, მეცნიერებისა და კულტურის სფეროებში, რასაც ემსახურება როგორც საქართველოში, ისე გერმანიაში ორგანიზებული ღონისძიებები, განხორციელებული და მიმდინარე პროექტები (კულტურის დღეები, გერმანულ-ქართული სამეცნიერო ფორუმი, მუსიკალური, კინო და სხვა ტიპის ფესტივალები, კონცერტები, გამოფენები და ა.შ.). კულტურის, განათლებისა და მეცნიერების სფეროებში ორმხრივი თანამშრომლობის საკითხებზე მუშაობს საქართველო-გერმანიის ერთობლივი/შერეული კომისია, რომელიც ამ მიმართულებებით თანამშრომლობის ინსტიტუციურ ჩარჩოს წარმოადგენს. ბოლო წლებში ერთ-ერთ პრიორიტეტულ მიმართულებად იქცა პროფესიული განათლების კუთხით თანამშრომლობა. გერმანული მხარის მხარდაჭერით დაინერგა დუალური საგანმანათლებლო პროგრამები არაერთ სფეროში მათ შორის, მევენახეობა-მეღვინეობა, სტუმარმასპინძლობა, სარესტორნო მომსახურება, კულინარია და სხვ.
საქართველოში წარმოდგენილია რეგიონული მნიშვნელობის გოეთეს ინსტიტუტი (Goethe-Institut) და გერმანიის აკადემიური გაცვლის სამსახური (DAAD). გერმანული ფონდებისა და ინსტიტუტების ხელშეწყობით, ქართველ სტუდენტებსა და მეცნიერებს ეძლევათ გერმანიის უნივერსიტეტებსა და სამეცნიერო დაწესებულებებში განათლების მიღებისა და სამეცნიერო საქმიანობის შესაძლებლობა.
1975 წლიდან დაძმობილებული ქალაქებია თბილისი და ზაარბრიუკენი, თელავი და ბიბერახი (1987-1988 წლებიდან), ბათუმი და როსტოკი (2012 წლიდან).
საქართველო-გერმანიას შორის ჩამოყალიბებული მჭიდრო, მეგობრული და მრავალმხრივი ურთიერთობების კონტექსტში მნიშვნელოვანია, რომ 2017 წლის აპრილში ოფიციალურად გაიხსნა საქართველო-გერმანიის წელი საქართველოში გერმანული დასახლებების დაარსების 200 წლისთავისა და დიპლომატიური ურთიერთობების 25 წლის აღსანიშნავად. საქართველო-გერმანიის წლის დასკვნით ფაზაზე, 2018 წლის ოქტომბერში საქართველომ საპატიო სტუმრის სტატუსით მონაწილეობა მიიღო ფრანკფურტის წიგნის საერთაშორისო ბაზრობაში.
გერმანიის საგარეო საქმეთა ფედერალური სამინისტრო
გერმანიის საკანონმდებლო ორგანო
ქ. ნიუ-იორკში ვიზიტის ფარგლებში, საქართველოს საგარეო უწყების ხელმძღვანელმა შეხვედრა გამართა გერმანიის ფედერაციული რესპუბლიკის საგარეო საქმეთა მინისტრთან, ანალენა ბერბოკთან. შეხვედრაზე საუბრის მთავარ თემას წარმოადგენდა გერმანიის მხარდაჭერა ევროკავშირში გაწევრიანების გზაზე.
2023 წლის 28 თებერვალს - 1 მარტს, საქართველოს საგარეო საქმეთა მინისტრის მოადგილე, თეიმურაზ ჯანჯალია სამუშაო ვიზიტით ბერლინში იმყოფება.
გრძელდება თეიმურაზ ჯანჯალიას შეხვედრები გერმანიის ბუნდესთაგში. მან შეხვედრა გამართა ევროკავშირის საკითხთა კომიტეტის თავმჯდომარესთან ანტონჰოფრაიტერთან (მწვანეთა პარტია).
2023 წლის 28 თებერვალს საგარეო საქმეთა მინისტრის მოადგილემ თეიმურაზ ჯანჯალიამ შეხვედრა გამართა ბუნდესთაგის წევრთან ნილს შმიდთან (გერმანიის სოციალ-დემოკრატიული პარტია).
2023 წლის 1 მარტს, ბერლინში, გერმანიის ფედერაციული რესპუბლიკის საგარეო უწყებაში, ქართულ-გერმანულ-ფრანგული სამკუთხედის ფარგლებში, კონსულტაციების მეოთხე რაუნდი გაიმართა.
2023 წლის 10 მაისს, ქ. ბერლინში ევროკავშირის წევრ სახელმწიფოებში საქართველოს საგანგებო და სრულუფლებიანი ელჩების სამუშაო შეხვედრა - ამბასადორიალი გაიმართება.
ბერლინში ევროკავშირის წევრ სახელმწიფოებში საქართველოს საგანგებო და სრულუფლებიანი ელჩების სამუშაო შეხვედრა - ამბასადორიალი გაიმართა. ღონისძიების მონაწილეებს სიტყვით მიმართა საქართველოს საგარეო საქმეთა მინისტრმა ილია დარჩიაშვილმა. მინისტრმა ისაუბრა ქვეყნის მიერ ევროინტეგრაციის კუთხით გადადგმულ ნაბიჯებზე და სამომავლო გეგმებზე.
2023 წლის 21 ივნისს, საგარეო საქმეთა მინისტრის მოადგილემ თეიმურაზ ჯანჯალიამ შეხვედრა გამართა გერმანიის ეკონომიკისა და კლიმატის დაცვის ფედერალური სამინისტროს სახელმწიფო მდივანთან სვენ გიგოლდთან.
„საქართველო ევროპული ინტეგრაციის ერთგულია, ჩვენ თანმიმდევრულად ვუახლოვდებით ევროკავშირს და ოპტიმისტურად ვართ განწყობილი, რომ საქართველო ამ გზაზე წარმატებას მიაღწევს“ - ამის შესახებ საქართველოს საგარეო საქმეთა მინისტრმა ილია დარჩიაშვილმა ჟურნალისტებს ბერლინში განუცხადა, სადაც გერმანელი კოლეგის ანალენა ბერბოკის მოწვევით, კონფერენციაში მონაწილეობს.
